സംസ്ഥാനത്ത് സ്വർണവില റോക്കറ്റ് വേഗത്തിൽ കുതിച്ചുയരുകയാണ്. ഈ മാസത്തിൽ മാത്രം പവന് 17,000 രൂപയിലധികം വർധനവാണ് രേഖപ്പെടുത്തിയിരിക്കുന്നത്. ഡോളർ സൂചികയിലുണ്ടായ ഇടിവാണ് ആഗോള വിപണിയിൽ സ്വർണത്തിന് പ്രിയമേറാനും വില വർധിക്കാനും പ്രധാന കാരണമായത്. നിലവിൽ ഈ മാസത്തെ ഏറ്റവും ഉയർന്ന നിരക്കിലാണ് സ്വർണവ്യാപാരം നടക്കുന്നത്.
കഴിഞ്ഞ ദിവസം മാത്രം പവന് വലിയ രീതിയിലുള്ള വിലക്കയറ്റമാണ് ഉണ്ടായത്. ഇന്നലെ രാവിലെ 1,080 രൂപ വർധിച്ച് 1,16,320 രൂപയിലെത്തിയ വില, ഉച്ചകഴിഞ്ഞ് വീണ്ടും 1,200 രൂപ കൂടി ഉയർന്ന് 1,17,520 രൂപ എന്ന റെക്കോർഡ് നിലവാരത്തിലെത്തി. ഇന്നും അതേ നിരക്കിൽ തന്നെയാണ് വ്യാപാരം തുടരുന്നത്. വരും ദിവസങ്ങളിലും വില ഇനിയും ഉയരാനാണ് സാധ്യതയെന്നാണ് വിപണിയിൽ നിന്നുള്ള റിപ്പോർട്ടുകൾ സൂചിപ്പിക്കുന്നത്.
ഉപഭോക്താക്കൾക്ക് തിരിച്ചടി സ്വർണവിലയിലുണ്ടാകുന്ന അനിയന്ത്രിതമായ കുതിപ്പ് സാധാരണക്കാരായ ഉപഭോക്താക്കളെ വലിയ പ്രതിസന്ധിയിലാക്കിയിട്ടുണ്ട്. പണിക്കൂലിയും നികുതിയും ഉൾപ്പെടെ കണക്കാക്കിയാൽ നിലവിൽ ഒരു പവൻ ആഭരണം വാങ്ങാൻ 1.25 ലക്ഷം രൂപയിലധികം ചിലവാക്കേണ്ടി വരും. ഒരേ ദിവസം തന്നെ പല തവണ വില മാറുന്ന അസ്ഥിരമായ സാഹചര്യം സ്വർണ വിപണിയിൽ ആശങ്ക വർദ്ധിപ്പിക്കുന്നുണ്ട്.
